Sa usapin ng ugnayan ng Taiwan at Poland, sinabi ni Kalihim ng Ugnayang Panlabas Lin Chia-lung noong Oktubre 2 sa isang post sa social media na nakababahala ang insidente ng paglabag ng Russian drone sa himpapawid ng Poland. Ayon sa kanya, ipinapakita nito na malapit na magkaugnay ang seguridad sa Indo-Pacific at Europa. Sa harap ng lumalakas na ugnayan ng mga awtoritaryong bansa tulad ng China, Russia, North Korea at Iran, mas kailangan umanong magkaisa ang mga demokrasya. Idiniin niya na likas na matatag na katuwang ang Taiwan at Poland at kailangang magtulungan sa pagpapanatili ng kapayapaan at katatagan sa rehiyon.

Binigyang-diin din ni Lin na matagal nang nakabatay sa kalayaan, demokrasya at karapatang pantao ang ugnayan ng Taiwan at Poland. Lumawak ang kanilang kooperasyon sa iba’t ibang larangan tulad ng kalakalan at pamumuhunan, pagpapatupad ng batas, at inobasyon sa agham at teknolohiya. Noong Hulyo, inanunsyo ng Taiwan ang pagpasok ng sariwang blueberry mula Poland kaya’t nakikinabang din ang mga mamamayan sa matamis na bunga ng pagkakaibigan ng dalawang bansa.

Noong Setyembre 29, bumisita si Lin sa Poland at nagsalita sa Warsaw Security Forum. Nakipagpulong din siya sa mga mambabatas mula sa iba’t ibang bansa at nagdaos ng tanghalian para sa mga parlyamentaryong Polish na sumusuporta sa Taiwan. Dalawampung mambabatas ang dumalo, kabilang ang Pangalawang Pangulo ng Senado na si Michal Kaminski. Para kay Lin, malinaw na patunay ito ng matatag na suporta ng Kongreso ng Poland sa Taiwan.