Natapos na ang ika-9 na Taiwan–Philippines Industrial Collaboration Summit na sabay na inorganisa ng Department of Industrial Development ng Taiwan at ng Federation of Philippine Industries noong Oktubre 1 sa Maynila. Sa forum na ito, nagkaroon ng kasunduan sa pagitan ng Taiwan Electrical and Electronic Manufacturers’ Association (TEEMA) at Semiconductor and Electronics Industries in the Philippines Foundation Inc. (SEIPI) para sa pagpapatupad ng Memorandum of Understanding o MOU. Nakatuon ang kasunduang ito sa pagtutulungan sa larangan ng green manufacturing at pagpapatatag ng sustainable supply chain.

Bukod sa kasunduang ito, nabuo rin ang dalawang MOU sa parehong forum. Una, ang Tyling Co. Ltd. at Proud Ocean Corporation ay magsasanib-puwersa upang palakasin ang kalidad ng imbakan at distribusyon ng mga produktong isda gamit ang cold chain logistics at aquaculture. Ikalawa, lumagda rin sa kasunduan ang Chung-Hua Institution for Economic Research at ang Ateneo de Manila University Center for Economic Research and Development para palawakin ang pananaliksik at pag-aaral sa ugnayan ng dalawang bansa. Ayon sa Industrial Development Administration, mahalaga ang mga ito upang higit pang mapalakas ang kooperasyon ng Taiwan at Pilipinas sa larangan ng green manufacturing, cold chain technology at academic exchange.

Itinampok sa forum ang temang nakasentro sa “AI Innovative Applications.” Ilan sa mga nagsalita ay sina Chiu Chuan-cheng, consultant ng Taiwan AI Innovation Application Alliance, Lin Yi-jui, executive director ng Taiwan Cold Chain Association, Wu Yu-ying, PhD ng Chung-Hua Institution for Economic Research, at Wang Cheng-yu, director ng Information Technology International Co. Ltd. Tinalakay nila ang mga isyu ukol sa electronics, cold chain logistics, makabagong teknolohiya at mga industrial zone upang suriin ang tamang hakbang tungo sa digital transformation at pag-upgrade ng industriya.

Dagdag pa rito, unang beses ding nagsagawa ng joint industry networking event ang TEEMA at SEIPI. Dinaluhan ito ng 20 kompanya mula Taiwan at Pilipinas na nagkaroon ng one-on-one business matching. Saklaw ng mga pag-uusap ang electronic components, system integration at AIoT applications na layong magbuo ng pangmatagalang ugnayan at konkretong pakikipag-partner sa negosyo.