Naglabas noong ika-26 ang European Commission ng kahilingan sa Chinese e-commerce giant na SHEIN upang magpaliwanag tungkol sa pagbebenta sa kanilang platform ng mga adult sex dolls na kahawig ng mga bata—isang isyung nagdulot ng matinding reaksiyon sa France. Ayon sa EU, nangangamba sila na maaaring magdulot ito ng panganib sa mga mamimili sa buong Europa.

Ayon sa European Commission, nagpadala na sila ng opisyal na kahilingan para sa impormasyon sa kumpanyang itinatag sa China, dahil sa “paunang palatandaang nagpapakitang may ilegal na produkto sa platform, partikular ang child-like sex dolls at mga armas.”

Ipinahayag ng Komisyon na batay sa mga ulat mula sa France at ilang pampublikong dokumento, “pinaghihinalaan ng Brussels na maaaring may sistematikong panganib sa mga mamimili sa buong EU ang sistema ng SHEIN.”

Hiniling din ng EU Commission sa SHEIN na magsumite ng detalyadong impormasyon at internal documents kung paano nito “tinitiyak na hindi makakakita ang mga menor de edad ng hindi angkop na content,” lalo na tungkol sa kanilang age-verification measures. Nais din malaman ng Komisyon kung paano pinipigilan ng SHEIN ang pagbebenta ng ilegal na produkto at kung gaano kaepektibo ang kanilang mga hakbang.

Ang kahilingang ito ay batay sa malawakang regulasyon ng EU na Digital Services Act (DSA), na nagbibigay awtoridad sa EU na pansamantalang ipasara ang operasyon ng isang platform. Ang paghingi ng impormasyon ay maaaring humantong sa pormal na imbestigasyon at posibleng multa, ngunit hindi ito nangangahulugang lumabag na ang SHEIN o may parusa na agad.

Ang SHEIN, na itinatag noong 2012 sa China at ngayo’y may punong tanggapan sa Singapore, ay nakaranas ng malaking pagbatikos sa France nitong buwan dahil sa pagbebenta ng child-like sex dolls. Kumilos na ang pamahalaang French upang pansamantalang ipatigil ang operasyon ng platform.

Nakatakdang dinggin ng korte ang kaso ngayong linggo, ngunit ipinagpaliban ito at inaasahang bubuksan muli sa susunod na linggo. Samantala, nagbukas na rin ang Paris prosecutor’s office ng imbestigasyon laban sa SHEIN at sa AliExpress, pagmamay-ari ng Alibaba, dahil sa pagbebenta ng mga sex doll na kahawig ng mga bata.

Nagpahayag naman ang SHEIN na makikipagtulungan ito sa mga awtoridad ng France at inanunsyo na ipagbabawal na nila ang pagbebenta ng anumang uri ng sex dolls sa kanilang platform.