Naglabas ng ulat ang international anti poverty organization na Oxfam noong ika labing siyam na nagsasabing umabot sa pinakamataas na antas sa kasaysayan ang kabuuang yaman ng mga bilyonaryo sa buong mundo pagsapit ng 2025, at nagbabala sa posibleng lubhang mapanganib na epekto nito sa pulitika habang nagtitipon ang mga pandaigdigang elite sa World Economic Forum.

Batay sa pinagsamang ulat ng AFP at Reuters, sinabi ng Oxfam na ang mga polisiya ni Pangulong Donald Trump ng Estados Unidos ang naging pangunahing salik sa mabilis na pagdami ng yaman ng mga superyaman. Sa unang taon ng kanyang ikalawang termino, tumaas ng 16.2 porsiyento ang kabuuang yaman ng mga bilyonaryo at umabot sa 18.3 trilyong dolyar. Mula pa noong 2020, umakyat na ng 81 porsiyento ang kanilang pinagsamang yaman. Taun taon inilalabas ng Oxfam ang ulat na ito bago ang Davos forum.

Ayon sa ulat, ang bilis ng paglago ng yaman ng mga bilyonaryo noong nakaraang taon ay tatlong beses na mas mataas kaysa sa karaniwang antas sa mga nagdaang taon, isang rekord na lalong nagpapalalim ng hidwaang pang ekonomiya at pampulitika at naglalagay sa panganib sa katatagan ng demokrasya.

Sa kabilang banda, tinatayang isang ikaapat ng populasyon ng mundo ang nahaharap sa kakulangan sa regular na pagkain, habang halos kalahati ng sangkatauhan ang nabubuhay sa kahirapan.

Pangunahing ibinatay ng Oxfam ang ulat nito sa mga datos at pag aaral mula sa World Inequality Database at Forbes. Ipinapakita ng mga pag aaral na ang biglaang pagdami ng yaman ng mga bilyonaryo ay kaakibat din ng matinding konsentrasyon ng kapangyarihang pampulitika, kung saan ang tsansa nilang makapaghawak ng posisyong pampamahalaan ay apat na libong beses na mas mataas kaysa sa karaniwang mamamayan.

Ikinabit ng Oxfam ang paglawak ng yaman ng mga bilyonaryo sa mga polisiya ni Trump, kabilang ang pagbawas ng buwis, pagprotekta sa malalaking multinasyunal na korporasyon laban sa pandaigdigang presyur, at pagluwag ng regulasyon laban sa monopolyo.

Dagdag pa rito, ang mabilis na pagtaas ng halaga ng mga kumpanyang may kaugnayan sa artificial intelligence ay nagbigay rin ng karagdagang kita sa mga mayayamang mamumuhunan.

Ayon kay Oxfam Executive Director Amitabh Behar, kasabay ng paglaki ng agwat ng mayaman at mahirap ay ang paglitaw ng lubhang mapanganib at hindi napapanatiling mga problemang pampulitika. Hinikayat ng Oxfam ang mga pamahalaan na bumuo ng malinaw na plano laban sa hindi pagkakapantay pantay, magpataw ng mas mataas na buwis sa malalaking yaman, at palakasin ang paghihiwalay ng pera at pulitika sa pamamagitan ng paghihigpit sa political lobbying at campaign financing.

Sa kasalukuyan, iilang bansa lamang tulad ng Norway ang may umiiral na buwis para sa mayayaman, habang ang United Kingdom, France, at Italy ay tinalakay pa lamang ang mga kahalintulad na hakbang.

Tinukoy rin ng Oxfam na noong nakaraang taon lamang ay nadagdagan ng 2.5 trilyong dolyar ang yaman ng mga bilyonaryo, halagang katumbas ng pinagsamang yaman ng 4.1 bilyong pinakamahihirap na tao sa mundo.

Lumampas na sa tatlong libo ang bilang ng mga bilyonaryo sa buong mundo noong nakaraang taon. Nanguna rito si Elon Musk, punong ehekutibo ng Tesla at SpaceX, na ang net worth ay unang umabot sa mahigit 500 bilyong dolyar, ang kauna unahang indibidwal na nakatawid sa ganitong antas ng yaman.

Nagbabala si Behar na dahil sa pagnanais ng mga gobyerno na palugdan ang mga elite, nakagagawa sila ng mga maling desisyon gaya ng pagbawas ng tulong at pagurong ng mga kalayaang sibil.

Dagdag pa ng Oxfam, patuloy ding lumalakas ang impluwensiya ng mga superyaman sa tradisyonal at digital na midya. Mahigit kalahati ng malalaking media companies sa buong mundo ay kontrolado na ng mga bilyonaryo, kabilang sina Jeff Bezos, Elon Musk, Patrick Soon Shiong, at Vincent Bollore.