Nagwagi ang Liberal Democratic Party ng Japan sa pangunguna ni Punong Ministro Takaichi Sanae matapos nilang makuha nang mag-isa ang higit sa dalawang katlo ng puwesto sa halalan para sa Mababang Kapulungan ng Parlamento. Binati ni American Institute in Taiwan (AIT) Director Raymond Greene noong ika-9 ang resulta ng halalan sa Japan at ipinahayag ang pag-asa na mas lalalim ang koordinasyon at kooperasyon sa pagitan ng Estados Unidos, Japan, at Taiwan upang sama-samang itaguyod ang katatagan at kaunlaran ng rehiyon.

Magdiriwang ng ika-66 kaarawan si Emperor Naruhito ng Japan sa ika-23. Noong gabi ng ika-9, nagsagawa ang Japan Taiwan Exchange Association ng isang reception para sa pagdiriwang ng kaarawan ng Emperador. Pinangunahan ang kaganapan nina Kazuyuki Katayama at kanyang asawa. Dumalo rin sa pagtitipon sina Bise Presidente Hsiao Bi-khim, Taiwan Japan Relations Association Chair Frank Hsieh, National Security Council Secretary General Joseph Wu, Legislative Yuan Vice Speaker Johnny Chiang, Defense Minister Wellington Koo, Deputy Foreign Minister François Wu, at mga kinatawan ng iba’t ibang bansa na nakatalaga sa Taiwan.

Dumalo rin si AIT Director Greene sa reception at nag-post sa opisyal na Facebook page ng AIT na ikinatuwa niya ang pagkakataong personal na maiparating kay Kazuyuki Katayama ang taos pusong pagbati para sa kaarawan ng Emperador ng Japan, gayundin ang pagbati sa naging resulta ng halalan sa Parlamento ng Japan.

Binigyang-diin ni Greene na sa ilalim ng pamumuno ni Takaichi, inaasahan niyang makikita ang mas malalim na koordinasyon at kooperasyon sa pagitan ng Estados Unidos, Japan, at Taiwan upang sama-samang isulong ang katatagan at kaunlaran ng rehiyon.