Dumalo ngayon sa Legislative Yuan ang Punong Ministro ng Taiwan na si Cho Jung-tai upang magbigay ng espesyal na ulat at humarap sa interpelasyon kaugnay ng resulta ng negosasyon sa pantay na taripa sa pagitan ng Taiwan at Estados Unidos at ang epekto nito. Ayon kay Cho, nakamit ng Taiwan sa pamamagitan ng Investment Memorandum of Understanding at ng Taiwan US Reciprocal Trade Agreement o ART ang 15 porsyentong hindi pinapatung-patong na taripa at ang pinakapaborableng pagtrato sa ilalim ng Section 232. Kahit pa may naging desisyon ang Korte Suprema ng Estados Unidos, nananatili aniya ang legal na katatagan ng mga nasabing benepisyo. Iginiit niya na patuloy na magsisikap ang pamahalaan na makamit ang pinakamainam na pagtrato para sa Taiwan upang mapanatili ang kompetitibidad ng mga industriya at mapangalagaan ang pambansang interes.

Ipinaliwanag ni Cho na bukod sa 15 porsyentong hindi pinapatung-patong na taripa, nakamit din ng Taiwan ang exemption mula sa reciprocal tariffs para sa 2,072 produkto, kaya bumaba sa 12.33 porsyento ang karaniwang taripa sa mga produktong iniluluwas sa Estados Unidos. Sa panig ng pag-angkat, napanatili ang seguridad sa pagkain at katatagan ng industriya, kung saan 93 produkto ang hindi binawasan ng taripa o pinanatili sa tiyak na antas, at 27 produktong agrikultural kabilang ang bigas ang hindi rin binawasan ng taripa.

Matapos ang desisyon ng mataas na hukuman sa Estados Unidos, ginamit ng panig ng Amerika ang Section 122 ng Trade Act of 1974 upang magpatupad ng pansamantalang taripa at posibleng palawakin pa ang imbestigasyon. Sinabi ni Cho na agad na nakipag ugnayan ang pamahalaan sa Estados Unidos at sinuri ang posibleng epekto nito. Binigyang diin niya na ang 15 porsyentong hindi pinapatung-patong na taripa na nakasaad sa ART ay may legal na katatagan at nagsisilbing matibay na batayan ng Taiwan sa harap ng pagbabago ng polisiya ng Amerika. Aniya, may ilang exemption sa ilalim ng ART na pabor sa Taiwan tulad ng para sa mga orchid na hindi kasama sa listahan ng exemption ng Section 122 ng Estados Unidos, at bagaman maaaring baguhin ng Amerika ang sarili nitong listahan sa pamamagitan ng executive order, ang mga exemption na malinaw na nakasaad sa ART ay hindi basta mababago, kaya ito ang itinuturing na pinakamahalagang pundasyon ng Taiwan sa harap ng pagbabago ng patakaran sa taripa ng Estados Unidos.

Idinagdag ni Cho na maaaring magpatuloy ang Estados Unidos sa pag aayos ng mga hakbang sa taripa sa pamamagitan ng Section 122, Section 301 o pagpapalawak ng mga hakbang sa ilalim ng Section 232. Gayunman, anuman ang maging pagbabago sa panlabas na kalagayan, ang ART at ang investment MOU ay nakapagtatag na ng institusyonal na balangkas na magtitiyak ng relatibong kalamangan para sa Taiwan.

Sa huli, sinabi ni Cho na sa gitna ng pagbabago sa patakaran sa taripa, hindi babawasan ng pamahalaan ang nakalaang 93 bilyong New Taiwan dollars na espesyal na badyet. Patuloy ring ipatutupad ng Ministry of Economic Affairs, Ministry of Agriculture at Ministry of Labor ang kani kanilang mga programang suporta, at sa susunod ay lalong paiigtingin ang mga hakbang upang tulungan ang mga industriya ng Taiwan na mapakinabangan ang kanilang mga kalamangan.

Samantala, sinabi ni Vice Premier Cheng Li-chiun na ang paggamit ng administrasyon ni Donald Trump sa Section 122 bilang pansamantalang instrumento sa taripa ay isang transisyonal na hakbang lamang. Ang reciprocal trade agreement na napagkasunduan ng Taiwan at Estados Unidos ay nananatiling mahalagang pundasyon sa muling pagbuo ng sistemang pangkalakalan. Hinihintay ng Executive Yuan ang paglilinaw ng panig ng Estados Unidos hinggil sa legal na batayan at detalye ng mga benepisyo, at kapag nakumpirma na ito ay agad na ihahain sa Kongreso para sa pagsusuri.