Nadiskubre kamakailan ang umano’y nakatagong spy camera sa loob ng smoke detector ng Airlee Clinic branch sa New Taipei, dahilan upang magsagawa ng imbestigasyon ang mga awtoridad. Ayon sa Ministry of Health and Welfare ng Taiwan, kinakailangan ang pahintulot ng magkabilang panig para sa anumang video recording sa loob ng medical facilities, at kung mapatunayang lumabag sa batas, maaaring patawan ng multang hanggang NT$250,000 ang klinika.

Noong ika-5 ng Mayo, nagsagawa ng surprise joint inspection ang Taipei City Department of Health, consumer protection officials, at pulisya sa isa sa mga branch ng Airlee Clinic sa Taipei. Sa inilabas na pahayag ng grupo, sinabi nilang ganap silang nakikipagtulungan sa imbestigasyon at magbibigay ng detalyadong paliwanag sa publiko kapag umusad na ang kaso upang maalis ang pangamba ng publiko.

Ayon sa Airlee Clinic, ang layunin ng kanilang surveillance equipment ay upang matiyak ang kalidad ng serbisyong medikal at seguridad ng mga gamot at kagamitan, at hindi umano ito para labagin ang privacy ng mga pasyente.

Sinabi ni Liu Yu-ching ng Department of Medical Affairs ng Ministry of Health and Welfare noong ika-6 ng Mayo na batay sa Article 72 ng Medical Care Act, hindi maaaring basta ibunyag ng medical institutions at kanilang personnel ang impormasyon hinggil sa kondisyon o kalusugan ng pasyente na nalaman nila sa trabaho.

Kung mapatunayang lumabag sa nasabing batas, maaaring patawan ng multang mula NT$50,000 hanggang NT$250,000 alinsunod sa Article 103 ng parehong batas. Dagdag niya, magpapadala ang central government ng opisyal na liham sa local health authorities upang magsagawa ng administrative investigation at alamin kung may paglabag nga sa batas.

Ipinaalala rin ni Liu na noong 2015 ay inamyendahan ng Ministry of Health and Welfare ang “Medical Privacy Protection Regulations,” na pinalawak mula outpatient areas tungo sa buong ospital o medical institution. Nakasaad dito na sa anumang medical consultation o treatment process, kung nais mag-audio o video recording ng alinmang panig — doktor man o pasyente — kinakailangan munang kumuha ng pahintulot mula sa kabilang panig upang maprotektahan ang privacy rights ng pasyente.

Tinanong din si Liu kung posible bang ipasara ang klinika o kanselahin ang business license nito. Ipinaliwanag niyang ang suspension of operations ay isang administrative punishment na nangangailangan muna ng malinaw at konkretong ebidensya mula sa imbestigasyon ng local health authorities bago ito maipatupad.

Aniya, sa paunang pagsusuri ay mukhang hindi pa saklaw ng kasalukuyang sitwasyon ang mga probisyon sa ilalim ng Article 108 ng Medical Care Act na maaaring magresulta sa pagpapasara o pagbawi ng lisensya ng isang medical institution.

Nakasaad sa Article 108 na maaaring patawan ng partial o total suspension ng operasyon mula isang buwan hanggang isang taon, o kaya’y kanselahan ng lisensya, ang medical institution kung may seryosong kapabayaan na nagdulot ng pagkamatay o pinsala ng pasyente, pamemeke ng medical records o certificates, paggamit ng ipinagbabawal na gamot o medical procedures, pagpapagawa ng medical work sa hindi lisensyadong tao, o pagsasagawa ng immoral o mapanganib na negosyo.

Kasama rin dito ang overcharging o ilegal na paniningil sa mga pasyente na napatunayang totoo ngunit hindi naibalik sa mga naapektuhan. Sa ngayon, patuloy pa rin ang imbestigasyon ng mga awtoridad kaugnay ng umano’y spy camera incident sa Airlee Clinic.