Nagpulong noong ika-5 sa Maynila si Philippine Defense Secretary Gilberto Teodoro at si Japanese Defense Minister Shinjiro Koizumi, kung saan lumagda ang dalawang panig sa isang pahayag ukol sa kooperasyon sa defense equipment at technology. Nagkasundo rin sila na isulong ang paglilipat ng Japan ng mga kagamitang pandepensa sa Pilipinas, kabilang ang mga frigate na Abukuma class.

Sa press conference matapos ang pulong, sinabi ni Koizumi na habang lalong humihigpit ang kalagayan ng seguridad sa rehiyon at sa buong mundo, tinalakay nila ni Teodoro kung paano higit pang mapapalalim ang kooperasyon sa mga larangan ng polisiya, operasyon, at defense equipment at technology.

Aniya, sa ilalim ng binagong Three Principles on Transfer of Defense Equipment ng Japan at ng mga alituntunin sa pagpapatupad nito, nilagdaan ng magkabilang panig ang “Statement on Further Promotion of Defense Equipment and Technology Cooperation.” Nagkasundo rin sila na bumuo ng isang working group na binubuo ng mga opisyal mula sa mga sangay ng polisiya, operasyon, at kagamitan upang higit pang mapalakas ang koordinasyon sa mga kaugnay na usapin.

Bukod dito, nagkasundo rin ang dalawa na itulak ang komprehensibong kooperasyon sa kagamitan, kabilang ang edukasyon at pagsasanay, maintenance at logistical support, operational coordination, information sharing, at tamang pamamahala sa mga nailipat nang kagamitan. Tinalakay rin nila ang posibilidad ng mas maagang paglilipat ng Japan sa Pilipinas ng mga frigate na Abukuma class, mga TC-90 patrol aircraft, at iba pang defense equipment.

Matapos bumisita sa Australia at Indonesia, dumating si Koizumi sa Maynila noong ika-5. Nakatakda rin siyang dumalo sa ika-6 ng buwang ito sa Balikatan joint military exercises ng Pilipinas at Estados Unidos upang saksihan ang paglubog ng target ship gamit ang Type 88 shore based anti ship missile ng Japan Self-Defense Forces.

Noong ika-5 rin, bumisita si Koizumi kay Pangulong Ferdinand Marcos Jr. ng Pilipinas.

Noong nakaraang taon, parehong inaprubahan ng mga lehislatura ng Pilipinas at Japan ang Reciprocal Access Agreement o RAA, na nagbigay daan upang pormal na makalahok ngayong taon ang mga miyembro ng Japan Self-Defense Forces sa Balikatan exercises sa unang pagkakataon. Mula sa humigit-kumulang 140 katao noong sila ay observer lamang, umabot na ngayon sa humigit-kumulang 1,400 ang kanilang bilang.

Samantala, inilarawan naman ni Teodoro ang Japan bilang isang “mapagkakatiwalaang partner” at binigyang-diin na ang “pakikipaglaban nang magkabalikat” ng mga puwersa ng dalawang bansa ang pinakamataas na pagpapakita ng kanilang bilateral cooperation.

Sinabi rin ni Teodoro na ang pagluwag ng Japan sa mga restriksyon sa pag-export ng armas ay nagpapakita na kinikilala ng iba’t ibang bansa ang pangangailangang magtulungan at magsama-sama upang mapanatili ang kapayapaan at katatagan sa rehiyon.

Idinagdag niya na natapos na ng Japan ang paglilipat ng isang batch ng TC-90 patrol aircraft sa Pilipinas, at kung magdadagdag pa ito ng ibang modelo, labis itong ikatutuwa ng Pilipinas. Sinabi rin niyang nais makuha ng Pilipinas ang mga frigate na Abukuma class ng Japan, ngunit bago ito tanggapin, kailangan munang pabilisin ng Philippine Navy ang pagpapaunlad ng mga pasilidad para sa pagdaong at daungan, gayundin ang pagpapalakas ng maintenance at logistical capabilities nito.

Sa joint statement na inilabas kalaunan, muling pinagtibay ng dalawang panig ang kanilang pagtutol sa anumang pagtatangkang baguhin nang unilaterally ang status quo sa East China Sea at South China Sea sa pamamagitan ng puwersa o pamimilit. Nangako rin silang palalakasin ang bilateral at multilateral defense cooperation upang suportahan ang isang malaya at bukas na Indo-Pacific region.

Sa mga nakalipas na taon, patuloy na lumalalim ang defense cooperation ng Pilipinas at Japan sa operational level, kabilang ang pagpapatupad ng Reciprocal Access Agreement at ang paglagda sa Acquisition and Cross Servicing Agreement o ACSA.