Pinal na inaprubahan ng Legislative Yuan noong ika-8 ang special defense bill na may budget ceiling na NT$780 bilyon, malayo sa orihinal na bersyon ng Executive Yuan na nagkakahalaga ng NT$1.25 trilyon, o may diperensiyang mahigit NT$470 bilyon. Dahil dito, sinabi ngayong araw ni Premier Cho Jung-tai na ang tatlong mahahalagang bahagi ng military procurement ay hindi maaaring may kulang kahit isa, kaya hahanapin ng gobyerno ang pinaka-paborableng paraan sa ilalim ng diwa ng Konstitusyon at ng Budget Act upang mapunan lalo na ang pangangailangan ng sariling pag-unlad ng domestic military industry.

Isinumite ng Executive Yuan sa Legislative Yuan ang panukalang “Special Act on Strengthening Defense Resilience and Asymmetric Combat Capability Procurement Plan” na tatagal ng walong taon at may budget na NT$1.25 trilyon. Gayunman, ang bersyong ipinasa ng KMT at TPP noong ika-8 ay nilimitahan sa NT$780 bilyon at hindi isinama ang ilang item gaya ng direct foreign procurement at commissioned manufacturing.

Bago ang general interpellation sa Legislative Yuan ngayong araw, tinanong si Cho kung maghahain ba ang Executive Yuan ng panibagong special bill, ng supplemental budget, o kung isasama na lamang ito sa annual budget. Binigyang-diin niya na ang tatlong piraso ng puzzle ng military procurement ay hindi maaaring mawalan kahit isa at sinabi niyang maghahanap ang gobyerno ng “pinaka-paborableng paraan” alinsunod sa diwa ng Konstitusyon at sa mga probisyon ng Budget Act upang matugunan ang independent development ng domestic defense industry. Ani Cho, “Muli naming binibigyang-diin na ang tatlong piraso ng military procurement puzzle ay hindi maaaring kulangin kahit isa, at hindi rin maaaring maantala ang internasyonal na kooperasyon. Hindi rin maaaring isantabi ang mahalagang pag-unlad ng sariling defense related military industry ng bansa. Sa ilalim ng tatlong prinsipyong ito, ang naipasa ngayon na bahagi lamang ng special defense budget ay hindi sapat upang mabuo ang buong tatlong piraso ng puzzle. Kaya sa ilalim ng diwa ng Konstitusyon at ng Budget Act, hahanapin ng gobyerno ang pinaka-paborableng paraan upang sa nilalaman, proseso, at iskedyul ay mauna at mabilis na matugunan ang independent development ng domestic defense industry. Iyan ang pinakamainam na paraan upang mabuo ang tatlong piraso ng puzzle.”

Samantala, dahil nakatakda na rin ang isang pulong nina Donald Trump at Xi Jinping, nakatuon ang pansin ng marami kung babaguhin ba ng Estados Unidos ang posisyon nito sa arms sales sa Taiwan. Sinabi ni Cho na sa mga nakaraang taon ay may kongkretong pag-unlad at pagsulong sa relasyon ng Taiwan at Estados Unidos. Aniya, paulit-ulit ding naririnig mula sa mahahalagang lider at opisyal ng Amerika na hindi nila nais at hindi nila papayagan ang unilateral na pagbabago sa status quo sa Taiwan Strait. Para kay Cho, ito ang patunay ng mataas na antas ng tiwala sa pagitan ng Taiwan at Amerika, at sinabi niyang patuloy na isusulong ng gobyerno ang pagkakaibigan at kooperasyon ng dalawang panig batay sa pundasyong ito.

Ayon sa paliwanag ni Cho sa pagtatanong ni DPP Legislator Lin Yi-chin, ang NT$1.25 trilyong espesyal na panukala at budget ng gobyerno ay binubuo ng tatlong mahahalagang bahagi. Una ay ang “Shield of Taiwan.” Ikalawa ay ang pagpasok ng high technology upang makabuo ng isang precise kill chain para maprotektahan ang Taiwan. Ikatlo ay ang pagpapalakas ng lokal na military industry, na aniya ay lalong mahalaga. Binigyang-diin niya na hindi na maaaring ipagpaliban pa ang pambansang seguridad, hindi na rin maaaring maantala ang internasyonal na kooperasyon, at lalong hindi maaaring isuko ang pag-unlad ng defense industry ng bansa.