Nagtagumpay ang Taiwan People’s Party caucus sa pagsusulong ng pagpapalawig ng kasalukuyang sesyon ng Legislative Yuan, matapos tuluyang maipasa sa ikatlo at huling pagbasa ang kanilang panukala na pahabain ang sesyon hanggang Agosto 31 ngayong taon. Nauna nang naghain ng panukala ang TPP caucus upang palawigin ang sesyon hanggang Hulyo 31, at dahil sa bentahe sa bilang ng mga mambabatas ng KMT at TPP, agad itong naipasa sa second reading. Gayunman, hindi nagkaroon ng pagkakasundo sa inter-party consultations. Matapos ang pagtalakay ng plenary session ng Legislative Yuan noong ika-15, naghain muli ang TPP caucus ng binagong mosyon at hiniling na pahabain pa ang sesyon hanggang Agosto 31. Sa huli, dahil sa bentahe sa bilang ng blue at white camps, inaprubahan ng Legislative Yuan ang pagpapalawig ng sesyon hanggang sa naturang petsa.

Dalawang beses nagtitipon ang Legislative Yuan bawat taon sa pamamagitan ng regular sessions, kung saan ang legal na meeting period ay mula Pebrero hanggang katapusan ng Mayo at mula Setyembre hanggang katapusan ng Disyembre. Ngunit ayon sa batas, maaari itong palawigin kung kinakailangan. Sa panukalang iniharap ng TPP caucus noong Abril 10 sa plenary session, sinabi nitong mabagal umano sa trabaho sina Pangulong Lai Ching-te at Premier Cho Jung-tai dahil hindi pa nila naipapadala sa Legislative Yuan para sa review ang mga bakanteng nominasyon para sa Judicial Yuan justices at National Communications Commission commissioners. Idinagdag din ng panukala na hindi pa rin naisusumite sa lehislatura para sa deliberasyon alinsunod sa Treaty-Making Act ang mga teksto ng Taiwan-U.S. Reciprocal Trade Agreement o ART at Taiwan-U.S. Investment Memorandum o MOU. Dahil dito, sinabi ng TPP na kailangan ng lehislatura ng sapat na panahon upang mahigpit na busisiin ang mga kasong may kinalaman sa approval powers, general budget bill, ART, at MOU, kaya iminungkahi nitong pahabain ang sesyon hanggang Hulyo 31.

Dahil walang naging consensus sa pagitan ng ruling at opposition camps ukol sa panukalang extension ng sesyon, sumailalim ito sa isang buwang cooling off period para sa konsultasyon. Matapos nito, pumayag ang mga caucus ng magkabilang panig na isama ang panukala sa agenda ng plenary session ngayong araw at ipaubaya ito sa botohan. Ngunit matapos ang pagtalakay ng mga agenda item sa plenary session ngayong araw, naghain muli ang TPP caucus ng binagong mosyon upang palawigin pa ang sesyon hanggang Agosto 31.

Sa botohang isinagawa sa umaga ng plenary session, 53 ang bumoto pabor at 39 ang bumoto laban. Sa bisa ng kanilang mayorya, naipasa ng blue at white camps ang mosyon para sa extension ng sesyon, kaya nagpasya ang Legislative Yuan na pahabain ang kasalukuyang sesyon hanggang Agosto 31 ngayong taon.