Pormal na binuksan noong ika-14 ang 2026 Lviv Media Forum o LMF, isa sa pinakamalalaking taunang pagtitipon ng media sa Silangang Europa. Inimbitahan ang Radio Taiwan International o Rti na magpadala ng delegasyon sa nasabing pandaigdigang forum, at sa unang araw ng pagtitipon ay nakipagpulong ang pitong kasaping grupo na pinamumunuan ni Rti Chairperson Lai Hsiu-ju kay Lviv Mayor Andriy Sadovyi. Sa kanilang pag-uusap, tinalakay ng dalawang panig ang pamamahala sa lungsod sa gitna ng digmaan, media resilience, humanitarian aid, at mga posibilidad ng susunod pang kooperasyon.

Sa pagpupulong, ipinaliwanag ni Lai Hsiu-ju ang mahalagang dahilan ng pagpunta mismo ng Rti sa Ukraine. Aniya, mula nang simulan ng Russia ang malawakang pagsalakay noong 2022, agad na naglunsad ang Rti ng Ukrainian language service upang maiparating sa mamamayan ng Ukraine ang suporta ng Taiwan at mapagkakatiwalaang impormasyon. Sinabi niya na ang pagpunta nila sa Lviv, isang lungsod na puno ng tapang at lalim ng kasaysayan, ay hindi lamang simpleng pagdalo sa isang propesyonal na forum kundi isang kongkretong pagpapakita ng matibay na suporta ng media ng Taiwan sa soberanya ng Ukraine at sa mga demokratikong pagpapahalaga nito.

Binanggit din ni Lai ang dalawang boluntaryong mandirigmang Taiwanese na nag-alay ng buhay para sa demokrasya at kalayaan ng Ukraine, sina Tseng Sheng-kuang at Wu Chung-ta. Ayon sa kanya, ang kanilang kabayanihan ay malawak na kinilala kapwa sa Taiwan at sa Ukraine.

Mainit namang tinanggap ni Mayor Sadovyi at ng kanyang city government team ang pagbisita ng Rti. Sa kanyang mensahe, binanggit niya ang isang kasabihang Ukrainian at sinabing, “Tanging ang sapat na matapang ang hindi natatakot na pumunta sa Lviv sa panahong ito.” Nagpasalamat siya sa pagdating ng Rti at sinabing matagal nang may matibay na pundasyon ng kooperasyon ang Lviv at ang mamamayan ng Taiwan, at palagi nilang nararamdaman ang mainit at konkretong suporta mula sa Taiwan.

Sa kanyang presentasyon, ipinaliwanag ni Sadovyi ang aktuwal na kalagayan ng pagpapatakbo ng lungsod ng Lviv sa ilalim ng kalagayang pandigma. Partikular niyang binanggit ang ilang dosenang ambulansya at fire truck na donasyon mula sa gobyerno at mamamayan ng Taiwan na ilang linggo lamang ang nakalipas ay nakaparada sa city council square ng Lviv. Binanggit din niya ang humanitarian assistance mula sa medical teams ng Taiwan at ang tulong ng malalaking generator at transformer na gawa sa Taiwan, na patuloy umanong sumusuporta sa suplay ng kuryente ng Lviv at iba pang lungsod sa panahon ng krisis sa enerhiya sa Ukraine.

Mahigpit ang iskedyul ng pagbisita ng delegasyon ng Rti, at lalahok ang mga miyembro nito sa buong tatlong araw na programa ng LMF 2026. Sa ilalim ng pangunahing temang “The Hit Reality,” dadalo ang mga kinatawan ng Rti sa mga talakayan hinggil sa papel ng media sa panahon ng digmaan, information resilience, at internasyonal na cross-sector cooperation. Makikipagpalitan din sila ng pananaw sa mga media leaders mula sa mahigit 40 bansa at ibabahagi ang karanasan ng Taiwan sa pagharap ng media sa mga panlabas na banta.

Ayon sa Rti, magpapatuloy ito sa pagpapalalim ng palitan ng impormasyon sa pagitan ng Taiwan at Ukraine sa pamamagitan ng multi-language broadcasting at digital platforms, upang manatiling malakas ang tinig ng Taiwan sa pandaigdigang hanay ng mga demokrasya.