Sinabi ng Pilipinas na hiniling nito sa Korte Suprema na payagan ang mga awtoridad na arestuhin si dating Pangulong Rodrigo Duterte at kasalukuyang Senador Bato dela Rosa kaugnay ng madugong war on drugs, at ilipat siya sa International Criminal Court o ICC upang litisin.

Naglabas ang International Criminal Court ng arrest warrant laban kay Dela Rosa noong nakaraang linggo, kung saan inakusahan siya ng “crimes against humanity” kasama si Duterte at iba pang sinasabing mga kasabwat.

Pansamantalang nagkubli si Dela Rosa sa Senado noong nakaraang linggo habang humihiling sa Korte Suprema ng Pilipinas na pigilan ang tangka ng gobyerno na siya ay arestuhin.

Sa isang dokumentong humihiling sa korte na ibasura ang apela ni Dela Rosa, sinabi ni Philippine Solicitor General Darlene Berberabe na “inalis na ng kanyang mga kilos ang kanyang sarili sa proteksyon ng batas.”

Ayon sa dokumento, na may petsang ika-16 ngunit inilabas lamang sa media noong ika-17, “Hangga’t hindi siya sumusuko sa mga awtoridad na panghukuman, dapat siyang ituring na isang pugante at hindi dapat payagang humingi ng anumang lunas mula sa mga hukuman.”

Hindi na nakita si Dela Rosa mula nang tahimik siyang umalis sa Senado noong ika-14.

Sinabi ng Department of Justice ng Pilipinas noong ika-15 na ipatutupad lamang ang arrest warrant ng International Criminal Court matapos ibasura ng Korte Suprema ang apela ni Dela Rosa, at hindi siya ikukulong maliban na lamang kung susubukan niyang tumakas palabas ng bansa.

Nauna nang sinabi ni Dela Rosa na iligal ang arrest warrant ng ICC dahil umatras ang Pilipinas mula sa treaty na lumikha sa hukuman noong 2019.

Iginiit naman ni Berberabe na ang pag-urong mula sa tratado ay “hindi nagpapalaya sa mga lumagda sa kasunduan mula sa obligasyong makipagtulungan sa mga prosesong naumpisahan na ng International Criminal Court.”

Sinimulan ng International Criminal Court ang imbestigasyon sa war on drugs ng Pilipinas noong 2018.

Inilunsad ni Duterte ang madugong kampanyang ito matapos siyang mahalal noong 2016, na nagresulta sa pagkamatay ng libu-libong tao, na ayon sa Human Rights Watch ay marami ay mga gumagamit ng droga at maliliit na tulak.

Inaresto si Duterte noong Marso ng nakaraang taon at inilipat sa Netherlands sa mismong araw ding iyon, kung saan siya nakakulong ngayon sa The Hague habang naghihintay ng paglilitis.

Nagsilbi si Dela Rosa bilang hepe ng Philippine National Police mula 2016 hanggang 2018.

Matapos magretiro, nahalal si Dela Rosa sa Senado noong 2019 at napanatili ang kanyang puwesto sa midterm elections noong nakaraang taon.