Kaugnay ng pagpapakawala ng China noong ika-6 ng interkontinental na ballistic missile mula sa submarino patungo sa Pacific Ocean, sinabi ngayong araw, ika-7, ni Presidential Office Spokesperson Kuo Ya-hui na ang hakbang na ito ay nagdulot na ng pangamba sa pandaigdigang komunidad. Nanawagan ang Taiwan sa China na magpigil at bumalik sa pandaigdigang kaayusang nakabatay sa mga patakaran.

Kinumpirma ng Chinese Navy na alas-12:01 ng tanghali noong ika-6, isang nuclear-powered submarine ng People’s Liberation Army ang nagpakawala ng isang submarine-launched intercontinental ballistic missile patungo sa pampublikong karagatan ng Pacific Ocean. Ang missile ay may dalang training-use simulated warhead o pang-ensayong warhead lamang.

Bilang tugon, sinabi ni Presidential Office Spokesperson Kuo Ya-hui sa isang panayam noong ika-7 na patuloy na lumilikha ang Beijing ng presyur militar sa First Island Chain, habang nagsasagawa rin ng gray zone harassment laban sa mga karatig-bansa. Dagdag pa niya, sa East China Sea, South China Sea, at sa paligid ng Taiwan Strait, ginagamit ng China ang tinatawag na “kunwaring pagpapatupad ng batas, pero tunay na pagpapalawak ng kapangyarihan.” Ngayon, matapos nitong subukan ang missile patungo sa Pacific Ocean, nagdulot na ito ng pangamba sa internasyonal na komunidad. Kaya naman nananawagan ang Taiwan sa China na magpigil.

Ayon naman sa Ministry of Foreign Affairs ng Taiwan, ang pagpapakawala ng China noong ika-6 ng strategic missile patungo sa Pacific Ocean ay sumisira sa kapayapaan at katatagan ng rehiyon, at nagdulot ng pagkabahala sa internasyonal na komunidad. Habang nagsisikap ang mundo na mapanatili ang pandaigdigang kapayapaan at seguridad, binalewala ng China ang katatagan ng rehiyon at patuloy na gumagawa ng mga hakbang na nagbabanta sa kasalukuyang kalagayan ng kapayapaan. Mariing kinondena ito ng Ministry of Foreign Affairs.

Dagdag pa ng Foreign Ministry, nitong mga nakaraang taon ay patuloy na gumagamit ang China ng military intimidation, economic coercion, at cognitive warfare bilang bahagi ng gray zone operations nito upang unilaterally baguhin ang kasalukuyang kalagayan sa Indo-Pacific. Hindi lamang nito pinapataas ang tensyon sa rehiyon, seryoso rin nitong hinahamon ang pandaigdigang kaayusang nakabatay sa mga patakaran. Muling ipinakita ng missile test na ito na ginagamit ng China ang military deterrence bilang kasangkapang pampulitika. Hindi ito nakatutulong sa kapayapaan at katatagan ng rehiyon, at lalo lamang nitong pinalalalim ang pangamba ng mga karatig-bansa sa pagpapalawak ng kapangyarihan ng China.

Samantala, sinabi ng Ministry of National Defense ng Taiwan na namo-monitor nila ang mga aktibidad tulad ng missile test ng Chinese Communist forces. Bagama’t hindi dumaan sa air defense identification zone ng Republic of China ang missile na pinakawalan ng China, nagdulot pa rin ito ng banta sa kapayapaan at katatagan ng rehiyon. Makikipagtulungan ang sandatahang lakas ng Taiwan sa mga kaalyado at kapartner na bansa upang mahigpit na bantayan ang mga susunod na pangyayari at magbigay ng angkop na tugon.