Isang Taiwanese teacher na mahigit 10 taon nang nagtatrabaho bilang guro sa China ang ikinulong ng mga awtoridad doon. Kinumpirma ni Luo Wen-jia ngayong Agosto 7 na halos 80 araw nang nakakulong ang guro dahil sa kanyang paniniwala sa Yiguandao, na itinuring ng mga awtoridad na may kaugnayan sa isang national security case.

Sinabi ni Luo na ipinaalam na ng Straits Exchange Foundation (SEF) ang kaso sa Association for Relations Across the Taiwan Straits (ARATS) noong unang bahagi ng Hunyo, ngunit makalipas ang dalawang buwan ay wala pa ring natatanggap na tugon.

Ayon kay Luo, tatlong Taiwanese teacher ang dinala ng lokal na pulisya mula sa kanilang paaralan noong huling bahagi ng Mayo. Dalawa sa kanila ang pinalaya matapos tanungin, habang ang isa ay nananatiling nakakulong hanggang ngayon.

Noong Hunyo 1, humingi ng tulong sa SEF ang pamilya ng nakakulong na guro. Agad na ipinaalam ng SEF ang kaso sa ARATS noong linggo ring iyon, ngunit hanggang ngayon ay wala pa ring tugon.

Sinabi ni Luo na matagal nang nagtatrabaho sa China ang mga gurong ito, at ang isa sa kanila ay 18 taon nang naninirahan doon. Batay sa impormasyong natanggap ng SEF, ang pagkakadakip sa tatlo ay may kaugnayan sa kanilang paniniwala sa Yiguandao, ngunit hindi malinaw kung bakit dalawa lamang ang pinalaya.

Binigyang-diin ni Luo na inilalabas ng SEF at Mainland Affairs Council ang datos tungkol sa mga Taiwanese na nawawala sa China upang paalalahanan ang publiko na ang sistemang legal, mga pagpapahalaga at paraan ng pamamahala sa isang bansang hindi demokratiko ay naiiba sa mga demokratikong bansa. Kaya dapat maging mas maingat ang mga Taiwanese na pupunta sa China, maging para sa trabaho o turismo.

Tungkol naman sa bagong exit and entry regulations ng China na magkakabisa sa Setyembre 15, sinabi ni Luo na nakasaad sa Article 4 na maaaring pagbawalan ang isang tao na lumabas ng bansa kung lumabag siya sa mga regulasyon sa export control o technology import management at itinuturing na posibleng banta sa industrial o technological security ng China.

Bagama't nakatuon ang probisyong ito sa mga Chinese citizen, sinabi ni Luo na dahil itinuturing ng Beijing na bahagi ng China ang Taiwan, posibleng gamitin din ang regulasyong ito laban sa mga Taiwanese businesspeople at Taiwanese na nagtatrabaho sa China at pigilan silang makabalik sa Taiwan.

Dahil dito, pinaalalahanan niya ang mga taong may negosyo o economic relations sa China na maging lubhang maingat.