Nagsagawa ngayong Agosto 11 ang Taiwan Railway Corporation at Shin Kong Mitsukoshi ng launching ceremony para sa kanilang Taipei Main Station ROT Mall Cooperation Project.

Sa ilalim ng ROT model, ang kasalukuyang public infrastructure ng gobyerno ay ipinagkakatiwala sa isang pribadong kumpanya upang mamuhunan sa pagpapalawak, renovation at pagpapahusay nito, at pagkatapos ay pangasiwaan at patakbuhin ang pasilidad.

Sinabi ng Shin Kong Mitsukoshi na mamumuhunan ito ng NT$1 billion sa loob ng susunod na 2 taon at 8 buwan para sa phased renovation ng Taipei Main Station commercial area.

Kasama sa plano ang pagpapahusay sa mga pasilidad at serbisyo, mga produkto, arts and cultural spaces, at kaligtasan, alinsunod sa walong pangunahing development goals ng Taiwan Railway.

Gamit ang konseptong “Window to the World,” layunin ng proyekto na gawing bagong gateway ng kabisera ang Taipei Main Station.

Pinangunahan ni Taiwan Railway Chairman Cheng Kuang-yuan at General Manager Feng Hui-sheng, kasama sina Shin Kong Mitsukoshi Vice Chairman Richard Wu at Executive Vice President at New Domain Development Chairman Eric Wu, ang launching ceremony.

Nasaksihan din ang seremonya ni Deputy Minister of Transportation and Communications Wu Sheng-yuan.

Sinabi ni Cheng na mahigit 600,000 passenger trips ang dumaraan sa Taipei Main Station araw-araw.

Bukod sa pagiging pinakamahalagang transportation hub ng Taiwan, ito rin aniya ang isa sa mga pangunahing gateway ng Taiwan patungo sa mundo.

Ayon kay Cheng, mahalagang milestone ang ROT project sa pagpapahusay ng mga ari-arian at kalidad ng serbisyo ng Taiwan Railway matapos itong maging isang state-owned corporation.

Sa pamamagitan ng public-private partnership, isusulong ang walong pangunahing development goals: pagbabago ng overall image, attractive dining, attractive shopping, international tourism, international-friendly services, public welfare spaces, safe environment, at AI-powered smart services.

Aniya, layunin nilang gawing higit pa sa isang transportation hub ang Taipei Main Station at i-upgrade ito bilang isang lifestyle experience center na may international perspective at lokal na karakter, upang makalikha ng bagong capital gateway na maipagmamalaki ng Taiwan.