Inihayag ng Ministry of Foreign Affairs (MOFA) ng Taiwan na mariin nitong kinokondena ang planong joint naval navigation exercise ng China at Indonesia sa karagatan sa silangan ng Taiwan, na inanunsyo ng Chinese Ministry of National Defense noong August 11. Ayon sa MOFA, muling ipinakikita ng Beijing ang pagwawalang-bahala nito sa mga internasyonal na pamantayan at responsibilidad, at lalo lamang nitong pinatataas ang tensyon sa rehiyon.

Ayon sa pahayag ng MOFA, agad na nakipag-ugnayan ang Taiwan sa Indonesia at iba pang kaugnay na panig upang linawin ang sitwasyon matapos ianunsyo ng China na lalahok ang Indonesian Navy sa naturang ehersisyo.

Sinabi ng ministry na batay sa impormasyong kanilang nakalap, ang Beijing lamang ang gumagawa ng mga mapanulsol at iresponsableng hakbang sa paligid ng First Island Chain, na nagdudulot ng pangamba at banta sa seguridad ng rehiyon.

Binigyang-diin ng MOFA na bilang isang responsableng miyembro ng rehiyon, patuloy na ipagtatanggol ng Taiwan ang soberanya at mga karapatan nito sa silangang karagatan ng bansa. Makikipagtulungan din ito sa iba pang regional partners upang mapanatili ang freedom of navigation at ang kapayapaan at katatagan sa Indo-Pacific.

Nauna nang inanunsyo ng Chinese Ministry of National Defense na sa kalagitnaan ng Agosto, magsasagawa ang PLA Navy's Honghe at ang Indonesian Navy frigate na KRI Layang ng isang navigation exercise sa karagatan sa silangan ng Taiwan. Kabilang sa mga nakaplanong aktibidad ang communications drills at underway replenishment o pagsasagawa ng resupply habang nasa dagat.