Patuloy ang mga forest fire sa Indonesia nitong mga nakaraang araw, at ang usok mula rito ay umabot na sa ilang bahagi ng Pilipinas, kabilang ang Metro Manila. Nanawagan ang Office of Civil Defense o OCD sa publiko na bawasan muna ang outdoor activities at magsuot ng face mask kung kinakailangang lumabas upang mabawasan ang posibleng epekto ng haze sa kalusugan.

Sinabi ni OCD Deputy Administrator Bernardo Rafaelito Alejandro ngayong araw na patuloy ang mga forest fire sa Indonesia at posibleng matangay ng southwest monsoon ang usok patungo sa Pilipinas. Sa ngayon, naapektuhan na umano ang Metro Manila at mga karatig-probinsiya, ilang bahagi ng Central Philippines, at Palawan.

Batay sa monitoring data ng Department of Environment and Natural Resources para sa fine particulate matter o PM2.5, umabot sa 225 ang Air Quality Index o AQI sa Manila City pagsapit ng alas-4 ng hapon. Sa Parañaque City naman, umabot ito sa 265. Parehong kabilang ang mga antas na ito sa kategoryang “very unhealthy.”

Ayon sa ilang weather experts na nagsalita sa isang news program, posible pang magpatuloy nang ilang araw ang haze sa ilang bahagi ng bansa.

Sinabi ni Alejandro na maaaring magdulot ang haze ng hirap sa paghinga, pag-ubo, pananakit ng dibdib, pagluha ng mga mata, at pangangati ng ilong. Maaari rin nitong palalain ang mga sakit gaya ng asthma, kaya pinapayuhan ang publiko na iwasan ang matagal na exposure sa maruming hangin.

Pinaalalahanan niya ang mga tao na bawasan ang paglabas kung hindi naman kinakailangan, lalo na ang mga bata at matatanda. Kung kailangang lumabas, mas mainam na gumamit ng wastong proteksiyon gaya ng N95 mask.

Dagdag pa ni Alejandro, para naman sa mga nagmamaneho sa gabi o sa mga lugar na mababa ang visibility, mainam na gumamit ng mas maliwanag na ilaw o fog lights upang mapanatili ang kaligtasan sa kalsada.