社群咧衝啥

社群咧衝啥？關廟少年真拚勢，時行話題教台語

Thu, 30 Apr 2026 06:00:00 +0800

這幾年佇網路社群平台經營台語口座的少年人愈來愈濟，隨人才調佮特色無齊齊，這回請來「阿東的哩哩叩叩」的「阿東」少年家，伊是早早就注心台語議題，2019年就經營台語面冊，伊的特色是真會掠時勢，啥物話題當衝，就會思考台語欲按怎來掰會，同時伊閣佇學校教台語𤆬子弟，做台語教師會搪著啥問題？幾若屆學生看落來，敢有啥款家己的體會？這集來聽阿東講出內底的烏佮白。

戲劇咧衝啥？(二)白狐開喙講人話，人敢會顛倒變精牲？

Thu, 23 Apr 2026 06:00:00 +0800

由金枝演社孤腳戲《籠子裡的白狐》而起的討論來到第二集，亞特佮小冬講起演出進前佇Podcast宣傳錄音彼日，竟然就是台北發生捷運無差別殺人事件的彼當下，正正對照著這齣戲內底對「人佮野獸之間的關係」的探討，到底人佮獸之間的界線佇佗？一旦超過彼條線，人敢誠實會變做獸？翻頭來講，人佇成長的過程當中，到底是按怎一步一步，行上「成獸之路」？這齣對小冬心中的烏暗面出發，半自傳、親像聊齋故事一般的怪奇古，到底咧暗示社會中啥款衝突、矛盾、烏暗，猶有……彼一絲仔光明？

戲劇咧衝啥？(一)「網路酸民」袂輸六月蚶，無責無任傷害人

Thu, 16 Apr 2026 06:00:00 +0800

最近拄搬煞孤腳戲《籠子裡的白狐》的「小冬」施冬麟，佇戲中一人趕幾若个角色，有男有女，有人有妖有動物，甚至閣是這齣戲的導演佮編劇，《籠子裡的白狐》佇台北演出了後，得著濟濟的呵咾佮鼓勵，嘛表現著演員佇舞台頂深厚的功力。毋過這齣戲是一齣對「烏暗面」出發的作品，戲文佮演技予人會笑、會驚、會讚嘆，嘛會濟濟對社會現象的剾洗。

這回趁《籠子裡的白狐》準備欲到台中演出，亞特專工邀請小冬來敨心肝liú腸肚，講家己的故事，也講戲內底的烏暗面是對家己佮社會按怎的觀察，是按怎伊會講35歲了後是伊的第二人生？第一佮第二人生分界的彼條線是啥款機緣？伊對社會的觀察又閣按怎去對照佇戲劇的創作？這集予你烏暗又閣光明的小冬－－演員施冬麟。

金枝演社《籠子裡的白狐》

金枝演社中生代全能創作者施冬麟
編、導、演火力全開，赤裸剖開自我的獨腳戲
說書 ╳ 吟唱 ╳ 戲曲 ╳ 操偶
打造風格獨特的魔幻現代聊齋

+++++++++++++++++++++++++++++

2024首演劇評盛讚：

★★★★★ 勇敢掀露人性的炫技曲！

★★★★★ 展現多角敘事的高難度技巧！

★★★★★ 難以言喻的精彩演出！

★★★★★ 連背肌背影都會演戲，讓人目不暇給！

【臺中國家歌劇院小劇場】
5/2 (六) 19:30 演後座談
5/3 (日) 14:30

購票：https://www.opentix.life/event/1996860022807158785

詩集咧衝啥？(二)詩、散文、小說，台文出版按怎揣路通出脫？

Thu, 09 Apr 2026 06:00:00 +0800

透過台文詩集《日花閃爍》衝上天的現象，這集對作者温若喬的角度，來看台文出版的市草佮新路。台文出版佇作家方面，敢有啥物會用得接觸著新讀者的寫作理路？若喬對「小情小愛的共通感情」、「文字的斟酌」、「詞彙對感情的鋪排」到「接受『無遐爾台語氣』」幾个方面來討論，是講……是按怎討論到尾仔，亞特煞得出一个結論：「台語是台灣的京都話」？？

詩集咧衝啥？(一)《日花閃爍》衝上天，台文媠詩啥道理？

Thu, 02 Apr 2026 06:00:00 +0800

你敢捌聽過《日花閃爍》這本台文詩集？自出版以來無論佇冊店、出版業界攏引起真濟討論，出版當日頭一刷就賣了了，全台冊店買無冊，短短二個月，竟然已經來到七刷，總印冊量超過25000本，這款驚人的成績，就算佇台灣的華文出版界嘛是現象級的大代誌，甚至這本詩集閣引起總統賴清德的注意，毋但佇台北國際書展收入總統冊單，聽講也是總統佇冊單內底頭一本讀的冊，甚至閣佇今(2026)年世界母語日邀請作者若喬到總統府讀《日花閃爍》內底的詩！

這款使人設想袂到的台文出版異象，背後敢有啥款社會的原因？作者若喬又閣做著了啥代誌？這集邀請若喬閣來到節目當中，以作者的角度來看《日花閃爍》的誕生佮現象觀察。

交友APP咧衝啥？(二)假冒名人陷愛戀，一騙2千800萬

Thu, 26 Mar 2026 06:00:00 +0800

這集由亞特單口來講古，講起假冒名人行戀愛路，有受害者佮車手攏是華仔的迷眾，嘛有韓國李敏鎬佮你Line的時字攏寫「簡中」，Brad Pitt講陷入離婚官司閣著癌真傷重，受害者投落2800萬(台票)錢煞齊失蹤。

網路名人佮交友詐騙到底有幾種？這集咱來開拆金光黨的手段有偌雄，嘛透過數據來看這幾年，敢誠實有做網路詐騙的防治，效果啥款，受騙的金額敢有減幾圓？咱若愈對詐騙手法有知機，就愈會當保護身邊的親人、朋友佮家己。

交友APP咧衝啥？(一)網路愛情敢有影？來問交友APP社會觀察家

Thu, 19 Mar 2026 06:00:00 +0800

亞特相片予人來偷提，佇網路冒充是欲創啥貨？聽講囥佇網路交友的軟體，毋知會產生啥問題？

為欲了解交友APP咧舞啥，這集特別請出廣播界前輩阿旻(曾偉旻)來贊聲，原來伊是交友APP的社會觀察家，幾若間服務伊攏有橐錢無咧驚心疼，聽講有人叫伊「老公～」貼心肝，害伊眩船閣愣山(gông-suann)，毋過想欲招出來相對看，對方無閒無奈何(bô-ta-uâ)，閣講二人著仝心做伙行，這个教趁錢的課程你著去報名，身陷情關的阿旻欲按怎？線頂交友到底是該看破，抑是有心拍翸(phah-phún)就有小生小旦的愛情戲通搬？

台灣史咧衝啥？台灣史補課當時行，網路冊店佔榜單

Thu, 12 Mar 2026 06:00:00 +0800

猶未上檔的電影《世紀血案》風波了後，眾人攏咧問「我怎會攏毋知遮的過去？」人人進入台灣史大補課階段，網路冊店甚至出現大銷排行前五名，有四本佮台灣史有關係(賰一本是台文詩集)，加上最近人稱「民主油罐車」的101董事長賈永婕佇網路喊聲，翻頭去了解台灣近代歷史變做一件時行代，佇這个湧勢當下，節目邀請以出版台灣相關歷史出名的前衛出版社總編輯鄭清鴻，來分享伊的觀察佮看法，嘛推薦適合的相關的冊予想欲「補課」的聽友，做伙熟似遐的「學校╱課本無教你的歷史」。

社群咧衝啥？台語氣口按怎練？就看Youtube懸頂 ê 台語仙 ft.光頭╱台語社群經營者

Thu, 05 Mar 2026 06:00:00 +0800

「粗皮雄」、「卓糞埽」，你敢聽過遮的電視劇人名？講著學台語，有真濟人會推薦看台語連續劇，毋過現此時的台語連續劇華語透濫濟，演員嘛毋是隨人攏真輾轉，這時過去一寡仔真出名、台語氣口真好的台語連續劇，就變成當衝的選擇矣！台語社群口座「Youtube懸頂 ê 台語仙」專門共過去真精彩的台語劇片段，特別是講著目今較少人講的用詞、俗諺剪出來，佮觀眾做伙分享、做伙學習，甚至嘛引起真濟人對過去的連續劇的趣味，顛倒翻頭去Youtube頂頭揣遮的官方放出來的影片來看。這款社群口座經營的想法是按怎來的？又閣會拄著啥款問題？未來口座想欲按怎發展？這集邀請「Youtube懸頂 ê 台語仙」口座創辦者，來分享做這个口座的想法佮收穫。

百萬咧衝啥？講台語提百萬，組隊比賽拚奪冠 ft.徛鵝、阿狗╱台語比賽冠軍隊

Thu, 26 Feb 2026 06:00:00 +0800

提走亞特的一百萬的敵手(?)來矣！電視節目《全家有智慧》第七季冠軍隊成員阿狗佮徛鵝來節目分享學台語、共台語抾轉來的過程，in 是底當時失落？又閣按怎抾轉來？猶有組隊對初賽一路過關斬將，最後提著總冠軍佮一百萬的心情佮鋩角，in 佇參加節目進前敢有做啥準備？聽講有利用製作單位的心態，掠著一寡仔鋩角？這款比賽閣著考慮賽制，毋但比程度，嘛著跋心機？這集就請阿狗佮徛鵝來講透機。

※阿狗佮徛鵝嘛有一个公視台語台的網路節目《少年，這一工》通線頂看喔！

特權咧衝啥？身份家世學歷，敢是會當繼承的利益？(二) ft.唐墨╱作家

Thu, 19 Feb 2026 06:00:00 +0800

Privilege來到第二集，特權到底是啥貨，這集咱對社會學者的講法來熟似Privilege的意義，猶有真濟趣味的比喻，有人是揹仔飽飽物件袂少，有人是啥攏無干焦一領破草蓆，平平欲去仝一个所在，有人是毋免操勞，橐袋仔底自然有車票，嘛有人是拚死拚活儉腸凹肚彼幫車才坐會著，階級的分別敢誠實會流動，或者敢穩當愛流動？除了經濟條件，privilege敢有其他類型？比論講「文化資本」、「社會資本」？3分的唐墨佮5分的亞特欲來討論18分的利益者，該當按怎討論？你聽落去就知。

特權咧衝啥？身份家世學歷，敢是會當繼承的利益？(一) ft.唐墨╱作家

Thu, 12 Feb 2026 06:00:00 +0800

前一站仔「特權」話題當時行，你認為家己的成長過程當中，是有特權抑是無特權的人咧？講到底，特權到底是啥？怎樣才算有/無特權？網路頂有人開出一張20題的特權試驗清單，亞特揣來唐墨做伙來做試題，看覓得著的分數到底是偌濟，是亞特懸抑是唐墨低？或者阮二人攏是無特權無翼通飛？邀請聽友做伙來聽節目做試題，共阮講你得著幾分！

戲劇咧衝啥？𤆬囡仔做伙看戲，彼碗鰇魚糜的滋味 ft.易蓁╱夾腳拖劇團團長

Thu, 05 Feb 2026 06:00:00 +0800

你敢捌食過鰇魚糜(魷魚粥)？你敢知，有一寡仔人逐年到了二二八，就會煮鰇魚糜來食？這碗鰇魚糜背後是一个家庭的故事，嘛是一个時代的故事。

台北市律師公會會長李瑞漢佇1947年二二八事件發生了後，召集台北市律師公會開會，對台灣省行政長官陳儀提出改革意見，3月10號佮小弟、朋友佇厝內做伙食鰇魚糜，便衣佮憲兵入來，將眾人𤆬走，李瑞漢安搭夫人邱杞妹，講鰇魚糜聽候伊轉來才食，自此，就毋捌轉來矣……

荖履仔劇團(夾腳拖劇團)推出結合尪仔、真人、光影佮故事冊、以李瑞漢的故事做基礎的囡仔戲，欲按怎予家長佮囡仔會當討論歷史，又閣袂傷過頭沉重？欲按怎予囡仔看戲毋免坐佇椅仔頂感覺捒縛？猶有，團長易蓁所講的，欲按怎予囡仔佮大人攏感覺著「愛」，才是這齣《鰇魚糜ê滋味》真正的芳頭。

電影咧衝啥？一齣《大濛》炤歷史，幼點濟濟敢看有？ ft.阿諺╱Podcaster

Thu, 29 Jan 2026 06:00:00 +0800

2025年台灣電影討論上濟的應該就是《大濛》矣，以白色恐怖時期做背景，講一个查某囡仔對嘉義到台北為欲領阿兄予政府銃殺的身屍，一路的種種過程，除了古錐好笑，嘛有使人毋甘佮感動甲流目屎的站頭，毋過電影內底幼點濟濟，你敢有看透？這集邀請歷史類Podcaster《敘事圈》的阿諺來開講，做伙討論《大濛》內底的阮所看著的幼點，猶有關係白色恐怖背景的電影到底愛講到偌深才是適當，電影看煞、節目聽了，咱做伙來想看覓。

心理學咧衝啥？社會事件引創傷，自我安搭借力量 ft.阿寶╱諮商心理師

Thu, 22 Jan 2026 06:00:00 +0800

無論是疫情、天災或者是舊(2025)年底的無差別殺人案這款咱無法度預防的事件發生，時常會造成規个社會的集體創傷，咱會變甲足無定著、真燥性、真齷齪(ak-tsak)，其實這攏有可能是這款心理創傷所引起的反應，咱為著欲安搭家己，會想欲得著閣較濟資訊予家己安心，毋過佇社群平台時行的這馬，你敢知，一直掰手機仔看社群資訊，有可能顛倒會引起二次傷害？！這集邀請諮商心理師阿寶來做伙討論關係集體創傷佇社群時代的應對方法。

社群咧衝啥？IG面頂衝袂離，這是「阿銘講台語」 ft.阿銘╱台語社群經營者

Thu, 15 Jan 2026 06:00:00 +0800

過去台語定定予人誤解是濟歲人才有咧講，現此時毋但少年人有咧講台語，而且有愈來愈濟人毋過有心講台語、學台語，閣會透過現代人時行的方式共學台語的鋩角，或者是生活中的大大細細事物的台語詞，推捒到可能的收眾面頭前，這款做法的成果閣不止仔有效。佇社群平台Instagram面頂透過Reels(短影音)功能來講台語、湠台語的「阿銘講台語」就是其中之一。

「阿銘講台語」才推出無偌久，21支Reels就吸引4萬外人追蹤，有的影片甚至有百外萬遍的收看，伊到底是按怎做的？敢有啥物鋩角通好想欲經營社群口座的人通好學起來的咧？毋過落勾這集節目！

嘉義咧衝啥？在地好食好𨑨迌，那耍那聽非洲鼓 ft.江鳥╱嬉班子樂團團長

Thu, 08 Jan 2026 06:00:00 +0800

這幾年嘉義好食好耍愈來愈時行，文化發展是閣較奢颺，這回邀請在地人，同時是非洲鼓樂團嬉班子的團長江鳥，來介紹予逐家較無了解的「新港」食食，猶有逐家傳說中的「涼麵+白醋」、「橋仔蜜+豆油+薑」的神奇組合，江鳥甚至講出外埔頭綜合果汁竟然無咧摻○○，原來綜合果汁猶有這款精差？

同時咱嘛𤆬聽友做伙來熟似嬉班子這个真特殊的在地鼓樂團，非洲鼓配台語聽起來是啥物感覺？這个團行過二十冬，又閣是按怎堅持落去？後回欲去嘉義𨑨迌，沿路會使那放嬉班子的歌來聽，穩當有無仝款的趣味。

死語咧衝啥？(三)四書五經讀透透，不識黿鼇龜鼊竈 ft.黃震南╱藏書家

Thu, 01 Jan 2026 06:00:00 +0800

「真‧台語怪物」來啦！對應前一陣仔的Youtube時事話題「中文怪物」佮threads頂頭的「死語運動」，人(就是伊家己)稱藏書界的「竹野內豐」黃震南老師佇網路頂開出二張「台語怪物」網路試題，考倒一片台語高手，這回亞特聯手震南老師，推出攏總三集「台語怪物全破解」，毋但解說答案，猶有各種補充佮對照，予你三集聽了，台語Level Up Up Up↑

本集解題：
✪清氣小姑碗崁屎
✪海瑞兵，會食袂相舂
✪牡丹的寫批，慘的加落寡
✪催命鬼，看做註生娘娘
✪袂輸魏延咧
✪袂輸呂蒙正
✪城隍爺的頭殼，你也敢挲
✪孔子公毋敢收人隔暝帖
✪蔡牽造炮炸家己
✪阿媽袂認得阿祥
✪文王拖車
✪食碗內，說碗外
✪俄羅兵，德國銃
✪程咬金三日皇帝
✪羅漢請觀音
✪呂洞賓，顧喙無顧身

死語咧衝啥？(二)四書五經讀透透，不識黿鼇龜鼊竈 ft.黃震南╱藏書家

Thu, 25 Dec 2025 06:00:00 +0800

本集解題：
✪趙子龍欠馬
✪食竹仔枝炒肉絲、食大封、食膨餅
✪驚死芋莖
✪毋通戇戇綴人去培墓
✪使用人
✪欶田螺
✪內條筋
✪共伊撈(hôo)起來滴水
✪一支跤毛管七个鬼
✪可憐的梅仔餅
✪䆀䆀仔仕相俥
✪佮孔子公諍字
✪海口仙
✪陳三磨鏡
✪菜礤姆仔

死語咧衝啥？(一)四書五經讀透透，不識黿鼇龜鼊竈 ft.黃震南╱藏書家

Thu, 18 Dec 2025 06:00:00 +0800

本集解題：
✪摃狗毋出門
✪六跤長鬚
✪你曷毋是林本源
✪這馬是咧陳三磨鏡，抑是英台哭兄？
✪硩貓岫
✪peh-jiáu-ue
✪咱人
✪頭毛有臭雞酒味
✪飽水
✪七里香，盤出牆
✪束樹奶--ê
✪斷半仙
✪坐(tshē)毋著

廟公咧衝啥？(二)雲遊環島帶任務，欲解因果大小事 ft.楊庭俊╱少年廟公

Thu, 11 Dec 2025 06:00:00 +0800

少年廟公繼續環台濟世！頂一集咱講起少年廟公按怎看待修行，猶閣有按怎做一个「自由廟公」了後，這集咱正港欲來環島修行濟世途矣，聽廟公講，伊的環島時常是神明旨意欲解因果，毋過這幾逝環島修行路，伊解了啥物因果？又閣拄著啥款怪事？有時廟公替神明做領隊，有時好親像就會當摸飛(moo-hui)？這集亞特專工請少年廟公推薦平常時真值得去行行兼拜拜的廟宇，趕緊來聽伊會介紹啥物廟！

廟公咧衝啥？神明旨意修行路，少年廟公濟世途(一) ft.楊庭俊╱少年廟公

Thu, 04 Dec 2025 06:00:00 +0800

少年廟公來央廣濟世矣～！佮過去刻板印象認為廟公攏是有歲人無仝，少年廟公楊庭俊猶真少年就咧廟內服務，離開了後竟然閣變成「自由廟公」？！這个「自由」是按怎來的？無固定服務的廟敢會用得講是「廟公」？行上環島濟世步步修行之路的廟公，沿途會搪著啥物代誌？出冊了後讀者有回饋，想袂到神明嘛會有交代？是講廟宇界的「愛哭團」佮神明界的「支持團體」到底是怎樣一回事……？

認證咧衝啥？烏鴉啉水投石落瓶，台語來講伊索寓言 ft.魏俊陽╱台語教師

Fri, 28 Nov 2025 06:30:00 +0800

節目播出的隔工11/29就是成大「全民台語認證」的考試日囉！毋知聽友敢有人去赴考咧？亞特先祝福有去考試的聽友，逐家攏提著心目中的好成績。

是講無論是教育部的抑是成大的台語認證考試，對你來講上困難的是佗一款題型咧？聽講有真濟人佇「口說」方面有較食虧，因為口說考試的型式是看圖講故事，對猶無遐爾慣勢以台語思考的朋友來講，欲雄雄就講出故事無重耽，確實是無簡單。今仔日這集介紹一本會使當做考試工具冊，嘛會使當然日常訓練、以「伊索寓言」做主題的冊，其實若是以亞特來看，這本冊嘛會使當做是練習台語家庭的家長講故事予囡仔聽的基礎訓練冊喔！

是講，亞特佇節目內底有分享一个應對台語口說考試的鋩角，只是……敢若無蓋實用……？

畫本咧衝啥？台語學藝術，「構圖」、「透視法」你敢講會出？

Fri, 21 Nov 2025 06:30:00 +0800

紅色、藍色、青色你會曉講，毋過「薰衣草紫」、「青蘋果綠」、「天空藍」台語欲按怎講？畫圖的工夫像「構圖」、「透視法」又閣按怎用台語表達？市面上現此時出現一本主打「用台語學藝術」的繪本《哎呦喂啊！愛用畫的》，圖面是今上時行的「台灣感性」風格，也是在地日常風景，聽講繪本閣有種種機關，幫助囡仔看繪本學藝術閣練台語？這集邀請發起繪本計畫的「畸零地工作室」成員孟榆佮以臻，來開拆這本台語繪本機關何在。

海產咧衝啥？凊彩食入腹肚底，台灣的魚仔你捌幾尾？ ft.黃之晹╱海洋大學副教授

Fri, 14 Nov 2025 06:30:00 +0800

這幾年時行講「台灣干焦海產文化，無海洋文化」，毋過你敢誠實了解「海產」？無論是掠的抑是養殖，咱常在是「食魚煞毋捌魚」，這集邀請海洋大學水產養殖系副教授、《好好吃魚》作者黃之晹來分享全台各地的海產特色，台灣定看的魚仔，你聽過幾款？閣食過幾款咧？這集聽了，揣機會行入市仔的魚擔，來熟似一下仔家己生活當中捷看著的魚仔啥款？

動畫咧衝啥？動畫開喙講台語，配音幼路有玄機 ft.葉又菁╱配音員

Fri, 07 Nov 2025 06:30:00 +0800

這幾年愈來愈濟出名動畫配做台語版，而且風評攏真好，《派對咖孔明》的台語版拄出來的時，甚至閣引起網路頂真大的討論，這集邀請著台華雙語配音員葉又菁來分享伊的台語配音經驗，猶有台語配音的現場指導又閣是咧創啥？你敢有看過佗一齣台語動畫？咱做伙來聽看覓，台語配音啥款鋩鋩角角？

AI咧衝啥？人工智慧滿滿是，按怎運用才合宜？ ft.莊哲昀AJ╱泛科學院頻道主理人

Fri, 31 Oct 2025 06:30:00 +0800

AI(人工智慧)愈來愈進入一般人的生活，目今咱無論掰手機仔、翕相、穡頭，甚至安排國內、外旅行攏有AI的影跡，毋過你的AI是人工智慧，抑是工人智慧？這就看你按怎共伊「牽教」矣。這集邀請著AI的專家、泛科學院Youtube頻道主理人「AJ莊哲昀」來節目開講，用上簡單的比喻，快速建立咱對AI的理解，同時嘛提醒咱，AI生產的物件愈來愈濟，網路消息真真假假，咱該愛如何面對未來的AI世界，按怎敢伊和平相處？

>>>泛科學院Youtube頻道

營隊咧衝啥？爸母的放冬救星，冬令營是咧搶啥貨？ ft.董力玄╱台灣台語路協會理事長

Fri, 24 Oct 2025 06:00:00 +0800

接續頂一集講台語學校，這集來關心學校放冬的時，家長會使共囡仔㧒……我是講……「安排」去佗位，才會用得消耗囡仔的體力，閣有收穫，袂規工佇厝閒仙仙，時間攏拍損去，閣會使予囡仔放假期間過了會歡喜、爸母嘛通歇喘，「營隊」是目今上時行的選擇，毋過營隊主題百百款，對台語家庭來講，敢有彼款會使學物件、會使耍甲忝歪歪，閣會使用台語來參加的營隊咧？台灣台語路協會直接揣營隊專門戶來合作，理事長力玄所介紹的營隊，和亞特家己都想欲去參加！「啊～～足想欲轉去囡仔時～～」

台語學校咧衝啥？母語欲活了好，著對教育來起造 ft.董力玄╱台灣台語路協會理事長

Fri, 17 Oct 2025 06:30:00 +0800

2025年9月1號起，高雄路竹的北嶺國小正式轉型做全台頭一間台語實驗小學，毋但引起真濟台語家庭的注目，也確實大大提升招生人數；同時也引起其他縣市台語家庭的討論，希望家己所在的縣市也會當設立台語小學。

到底台語小學是咧學啥？敢是有較濟台語課？抑是用台語咧上課？台語敢有法度用來上各種課？學校又閣會拄著啥款困難或者質疑？這集邀請台灣台語路協會理事長，同時也是台語家庭母親的董力玄，𤆬咱做伙來了解台語學校，嘛了解台語家庭的需求佮困境。

神怪劇咧衝啥？戲說籠面扮神明，會做會唱帶天命 ft.黃新皓╱演員、歌手

Fri, 10 Oct 2025 06:30:00 +0800

號稱「上緣投乩身」，閣是演員、閣是歌手的黃新皓(阿皓)來「告白」！佇出名本土劇《戲說台灣》演出田都元帥煞來衝紅的阿皓，毋但演神明，閣是自細佮神明有好交情！本底出道欲唱歌的阿皓，是按怎煞變成演員？而且一搬就是十偌年，毋但去到中國演出古裝的「籠面戲(偶像劇)」，轉來台灣嘛是戲路無停真無閒，踅一大輾煞又閣回到當初時上想欲做的歌手身份，這回推出專輯《新の告白》，聽講閣是佮神明先撨好勢的？阿皓講神明捌共伊指示：「成功著愛行遠路」，到底啥意思？做伙來聽神明的話按怎破解。

Podcast咧衝啥？鹿港阿愷聲悠悠，金鐘敢會提到手？ ft.阿愷╱Podcaster

Fri, 03 Oct 2025 06:30:00 +0800

鹿港阿愷來矣！這回以Podcast頻道《阿愷之聲》入圍廣播金鐘獎Podcast獎項，聽講煞變做「鹿港之光」，久無聯絡的親情、朋友攏來祝賀、在地媒體報導、政治人物嘛來介紹，入圍了後的阿愷，佇鹿港的生活有啥款改變咧？若誠實有機會上台領獎，敢有想好致詞欲講啥？來聽看覓阿愷按怎講。

Facebook>>>阿愷之聲Podcast
Instagram>>>阿愷之聲Podcast

台語漫才咧衝啥？激悾黜臭雙人好笑款，台頂盡看「妹迪 in Taiwan」ft.表妹、胡迪╱漫才演員

Fri, 26 Sep 2025 06:30:00 +0800

你敢看過來日本式的答喙鼓－「漫才」表演，台灣各地現此時有愈來愈濟漫才團體出現，其中上影目的團體之一，就是舊年才成立、由「表妹」佮「胡迪」二人所組成的「妹迪 IN TAIWAN」，二人毋但台風在、「(劇)本」好笑，閣較是台灣少數用台語講漫才的團體，in 的演出影片佇囥起去Youtube頻道，就隨隨引起真濟關注，in 的名是按怎來的？又閣是按怎會行這條漫才之路？台語佇漫才內底的意義是啥？這集咱做伙來熟似二位未來佇漫才領域穩當大出擢的「明日之星」。

顯化咧衝啥？心想事成靠顯化，manifest敢有遮爾聖？ ft.阿寶╱諮商心理師

Fri, 19 Sep 2025 06:30:00 +0800

你敢捌聽過予人心想事成的「顯化(manifest)」，顯化到底是啥？伊佮仝款真出名的「吸引力法則」敢有無仝？誠實只要照起工來，啥款願望攏會使實現？伊佮心理學敢有啥款關係？心理師按怎看待這个網路頂真時行的話題咧？這集邀請專業的諮商心理師阿寶，做伙來討論「顯化」到底是啥貨。

【聯絡阿寶丨心理師乾杯】

>>>Facebook

>>>Instagram

弄喙花咧衝啥？徛台笑詼來比武，百變和尚展功夫 ft.唐墨╱喜劇演員

Fri, 12 Sep 2025 06:30:00 +0800

※本集節目為著討論徛台笑詼的禁忌，一部份內容可能會使人感覺冒犯，請聽友家己斟酌敢欲收聽落去。
--
日本出家的台灣人做徛台笑詼(Stand-up Comedy，站立喜劇)會是啥物款？身份濟濟的唐墨閣來矣！伊這遍是以「喜劇演員」的身份，來講參加笑詼比賽節目《Talk Talk 秀台語》的想法，猶閣有電視台袂用得放「危險話題」！唐墨講伊做喜劇是為欲佇當中宏掦佛法，毋過徛台笑詼定定咧著火燒呢？？

講笑詼敢有啥禁忌？練喙花閣咧變啥物？聽這集予你又閣暢又閣驚！

美詞咧衝啥？仙氣媠聲有詩意，若喬陪你 O̍h Tâi-gí ft.溫若喬╱台語社群經營者

Fri, 05 Sep 2025 06:30:00 +0800

佇網路上予人叫做社群平台threads的淨化口座，以帶仙氣媠聲的聲音檔佮美感十足的配圖、詩意滿滿的例句來教台語，經營者「溫若喬」本人就是一位感覺聽伊講話氣質十足的女性，臨床心理學背景的若喬，按怎共伊的心理知識，用佇台語社群口座的經營？佇社群走跳往往會拄著使人慼心的人，伊又閣按怎排解心情？紲落來這个號做「o̍h Tâi-gí」的社群口座，又閣拍算講出啥物款佮別人無仝的路？

這一集，咱就欲佇淨化人心的仙氣媠聲當中，做伙來了解伊的台語社群經營之道。

字典咧衝啥？學習台文靠芋圓，緣投少年揣回母語舌 ft.芋圓╱APP開發工程師

Fri, 29 Aug 2025 06:30:00 +0800

想欲學台文佮台語，你需要好家私，一上線就引起濟濟討論的台語字典APP－芋圓字典的開發者「芋圓」本人來矣！猶真少年的芋圓捌佇國外生活幾若年，嘛捌做過教外國人講華語的Podcast頻道，是按怎落尾會想欲來開發台語字典APP咧？聽講伊是沓沓仔共母語抾轉來，對「一句講就袂曉話」，到會當全台語演講，這个過程是按怎做會到？

而且節目一開始，芋圓就雄雄喈(kainn)甲哼哼呻，到底亞特是講啥，予伊歹勢甲？！

在 Instagram 查看這則貼文

Rti腦癢央（@rti.nownow）分享的貼文

西拉雅咧衝啥？祖靈公媽我是啥人？我的姓是Akatuang ft.段洪坤╱西拉雅族部落發展促進會理事長

Fri, 22 Aug 2025 06:30:00 +0800

「(演講)時間不夠矣，我是原住民，應該會使『加分』啦乎？」這是西拉雅族人Alak Akatuang(段洪坤)佇一場演講內底所講的笑詼。毋過這个表面看來是咧剾洗原住民時常面對的考試加分話題變做笑詼，話仁內底煞是閣再反轉，直接對著原住民平埔族群爭取正名的相關議題。

是啥物情形，會予家己的阿舅當面講出「你人不做，欲做番？！」一个西拉雅人成長過程當中的疑問，以及族群意識的覺醒會是啥物款？西拉雅族人爭取的正名又閣是啥？這集咱對雲南大理國段氏皇族(？)講起，一直到妖精按怎修煉成人(？)……話題走精？聽落去你就知。

刑案咧衝啥？Twitter面頂九人被害，酷刑分屍藏佇厝內 ft.唐墨╱作家

Fri, 15 Aug 2025 06:30:00 +0800

※本集包含暴力血腥內容，無適合囡仔收聽，請斟酌！

2025年6月，日本執行一件死刑，犯人號做「白石隆浩(しらいし　たかひろ)，伊佇2017年8-10月期間，利用社群平台Twitter(現此時改名做『X』)，走揣有鋪文表示孤單、想欲自殺的查某囡仔，共遮的人誘拐到稅厝的公寓殺害，三個月內攏總刣死九人，這个驚動規个日本的「座間九人殺害事件」，到底是發生啥代誌？內底又閣牽涉著啥款社會文化佮死刑議題？這集邀請推理小說作家唐墨，做伙來開講這件驚天動地的刑事案件。

時行語咧衝啥？「蛋雕」、「泉」、「虫合」到底是啥物？社群用語講透機 ft.宜蘭╱廣播人

Fri, 08 Aug 2025 06:30:00 +0800

來賓：宜蘭╱廣播人

「蛋雕」、「泉」、「虫合」到底是咧講啥？網路時行語定定予人捎無摠？「已購買，小孩愛吃」、「急了」、「很躁」台語又閣會使按怎講？這集亞特邀請佇開播集誠受歡迎的宜蘭再度來做客，這回咱來講網路頂有人整理出來的「2024網路時行語」，遮的詞你敢攏看有？欲綴會著網路社群千變萬化，時行語咱著加知寡，做伙來熟似兼解破，才會知影目今囡仔咧講啥。

電子冊咧衝啥？冊無印佇紙簿，敢是未來的出路？ ft.鄭清鴻╱前衛出版社主編

Fri, 01 Aug 2025 06:30:00 +0800

中國品牌的電子冊閱讀枋(讀冊機)出現資安顧慮，佇網路社群引起真濟討論，連帶嘛予「電子冊」的價值到底佇佗的討論愈絞愈鬧熱，真濟人認為電子冊無實體印刷的成本，照理應該賣比實體的紙冊較俗，毋過目前市面上電子冊的價數佮紙本冊其實精差無濟，「機關安佇倉庫，其中必有緣故，冊無印佇紙簿，敢是未來的道路？」

咱欲按怎看待電子冊這款產品？電子冊生產又閣有啥物款難題？你敢有電子冊閱讀枋？或者是你敢會想欲愛一塊？這集邀請前衛出版社主編鄭清鴻，來共電子冊佮紙冊之間的愛恨情仇講透流。

高雄咧衝啥？台灣上衝的港都，好食好耍無崁步 ft.夕陽武士

Fri, 25 Jul 2025 06:30:00 +0800

這幾年高雄變做台灣演唱會的中心，世界各國的歌手、樂團攏來到高雄開唱，也連帶共高雄的觀光旅宿規个𤆬起來，高雄景點、美食佇社群平台嘛時常成做關鍵字，這集邀請高雄在地搖滾樂團「夕陽武士」來做導覽先生，替逐家𤆬路踅高雄，外行綴人買，內行看布底，想欲揣著在地人的「橐袋仔清單」，就毋通落勾這集，是講……亞特佮來賓怎會一開頭就先得失台南……？

2025 夕陽武士《下港少年回頭望》巡迴家鄉最終場資訊：

時間：8/16（六）18:00
地點：高雄海邊的卡夫卡－高流店
售票連結：https://kafka.kktix.cc/events/sunsetsamuraikafka

劇場咧衝啥？台魂西骨講有影台頂腔口漳泉拚 ft.施冬麟╱劇場演員

Fri, 18 Jul 2025 06:30:00 +0800

來賓：施冬麟╱劇場演員

佇網路社群時常會使看著人問起台語某某詞的發音，眾人留話的講法是定定無啥款，這時「腔口差」就會變成討論的話題，金枝演社2025年推出以「漳泉拚」做背景的台語舞台劇《整人王－新編邱罔舍》正正就是提「腔口差」來做話題的戲劇演出，看漳腔佮泉腔二个家族大捙拚，互相剾洗、看袂順眼，又閣看二爿的查埔囡仔佮查某囡仔相意愛，這層親事敢有可能講會定？聽講若欲會合和著靠邱罔舍？邱罔舍是何許人也？江湖傳說前世是鱸鰻精，這世佇人間捙龜弄甕干干仔人閣好額，想袂到伊的背後嘛有一段故事講無人聽，來來來，耳空著洗予清，人著坐予定，咱來聽搬演邱罔舍的演員施冬麟(小冬)，按怎講出邱罔舍的心聲。

阿媽咧衝啥？95歲做網衝，阿媽講古孫經營 ft.金棗阿媽、金孫

Fri, 11 Jul 2025 06:30:00 +0800

來賓：金棗阿媽、金孫

台灣上濟歲，嘛上古錐的網衝「金棗阿媽」來矣！！佇社群平台Instagram頂頭因為講古衝甲掠袂牢的「金棗阿媽」猶閣有幕後的經紀人、製作人兼查某孫的「金孫」，做伙來到「社群咧衝啥」分享阿媽是網衝的感想，70歲就感覺人已經無路用矣的金棗阿媽，佇95歲開創事業第二春，心境有啥款變化？金孫為欲經營阿媽的社群口座，拍拚學習台文，敢有啥物感想？這集咱來做伙了解，金棗阿媽的「網衝之路」。

前往＞＞央廣臺灣台語迷眾頁
聽友來函：atlantis919@rti.org.tw

【揣著亞特】

　亞特陪你káng台語
　亞特陪你káng台語
　✪ 亞特節目

　金棗阿媽來講古